Espertei ó tempo novo

….     …………….Coa dozura do tempo novo
…….     ………….follece a fraga e canta o pobo
……..     …………dos paxaros na súa fala
…….     ………….polo son da nova cantiga;
………..     ………logo está ben se un se regala
…….     ………….con aquelo polo que esliga.
……….     ……….[…]

Guillerme IX de Aquitania, en galego da man de Darío Xohán Cabana

Na poesía occitana medieval chámaselle tempo novo á primavera. Que maneira tan bonita de lle chamar, e que ben reflicte todo o que é a primavera, ou o que moitos queremos que sexa.

Hoxe celebrarei o tempo novo (e a república, e outras cousas) na Coruña presentando o libro Os trobadores de Occitania, escolma e tradución de Darío Xohán Cabana dos versos medievais dunha xente que lle cantaba á primavera e sufría e gozaba o amor dun xeito tan similar a nós que ás veces case espanta.

8 thoughts on “Espertei ó tempo novo

  1. Moitas obrigas me impiden estar nesa presentación, pero son un dos seareiros maiores desa magnífica obra á que nin sequera cómpre desexarlle éxito, porque é un éxito toda ela. Apertas para toda a familia!

  2. Alex Ghalpon estaba alí diante, na presentación d’Os trobadores de Occitania, sentada nunha cadeira académica, fermosa e con medias floridas coma a primavera do seu tocaio Alessandro Boticelli, coma a República, coma os seus anos acabados de facer, pois ela tamén naceu, coma a República, un 14 de abril: no temps novèl dos trobadores. Co orgullo popular, coma a pastora de Marcabrú: tot mon linh e mon aire / vei revertir e retraire / al vezog et a l’araire; da xente do arado polo pai. E pola nai de xente do mar e do barco: per mei l’aiga de Ròzer cantan li remador. E seu pai e súa mai e seu irmán estaban contentos de vela alí, bela coma unha belorita. Beizón por seres así e por estares sempre.

  3. versos medievais dunha xente que lle cantaba á primavera e sufría e gozaba o amor dun xeito tan similar a nós que ás veces case espanta. Creo que o espanto xurde… non de comprobar que sufrían e gozaban igual a nós, é algo que se desprende desa comprobación, outro pensamento que se cola, sutilmente.
    Tempo novo gústame moito máis tamén a mín, sempre pensei que o ano debería empezar no equinoccio da primavera e non aí, como empeza, no medio de nada.

    Como di un comentarista por aí arriba: que as celebracións non paren

    [eu onte tamen tiven algo que celebrar -ese medo do que falamos, xa vai alá]

  4. Pois eu agardarei aló para o xoves e pasar “o tempo novo” ao carón de xentes que quero. Magoa que, do camal, o tempo no quererá ser benigno para poder andar entre as beloritas das que falabas no outro día. Por onde andarás ti, galopina, seguro que lonxe delas. 🙂

    • Ando lonxe estes dias, nunha cidade fermosisima que ole a castinheiros de indias e lilos en flor… e a manteiga. Volverei à casa seguir gozando do tempo novo e sabéndovos a vos ai, debaixo do mesmo sol. Hoxe saudo especialmente a Zeltia pra darlle os meus parabéns (medos fora) e ao Dario, se eu son como son è porque ti e unha fermosa rapaza de area nos pès sodes como sodes (amor è a palabra que mais usaria pra falar de vos e pra falar de min con vos).

      • Non sei como se me despistou tan fermoso comentario que che deixou Darío e por riba coa información do teu cumpleanos, moitas primaveras máis para seres feliz che desexo!
        [Aquí choveu todo o tempo, vaia sorte tí arrecender a manteiga e os castiñeiros]

        Moitas grazas polos parabéns. Por lembrarte. Por entenderme. Si.

  5. Non foi despiste, Zeltia, é que o comentario foi visible días despois de que el o deixara aquí, cousas da seguridade do blog para os comentaristas primeirizos… 😉
    Moitas grazas polos teus parabéns e os teus bos desexos.
    Bicos de arrecendo a herba cortada que botan de menos o mar

Deixar unha resposta

introduce os teu datos ou preme nunha das iconas:

Logotipo de WordPress.com

Estás a comentar desde a túa conta de WordPress.com. Sair / Cambiar )

Twitter picture

Estás a comentar desde a túa conta de Twitter. Sair / Cambiar )

Facebook photo

Estás a comentar desde a túa conta de Facebook. Sair / Cambiar )

Google+ photo

Estás a comentar desde a túa conta de Google+. Sair / Cambiar )

Conectando a %s